.png){kind=small}
Bakers & Bloomers
Die eiewyse Ansophie Luther glo vas trou is niks minder as ’n lewensvonnis nie. Haar frustrasie loop egter hoog wanneer die pas gegradueerde Dokter William Victor terugkeer na sy tuisdorp en die skoner geslag soos brommers om hom hang.
Dinge is egter nie altyd soos dit blyk te wees nie. Wanneer Ansophie en William hulself skielik noodgedwonge in dieselfde bootjie bevind, moet hulle of saam roei of sink. Bakers en Bloomers is ’n lekker-lag komedie met gravitas en wie weet, dalk selfs ’n tikkie romanse.
Shangri-La
2019
Shangri-La het die gehoor saamgeneem afwaarts, die diepte in — na ’n ondergrondse skuilplek waar jongmense hul eie waarheid gekerf het om te oorleef. In hierdie donker oase het ritueel, mag en vrees ’n nuwe samelewing gevorm, een waar die buitewêreld as onherstelbaar gebreek beskou word. Die aankoms van ’n buitestaander het krake in hul sekerhede laat oopgaan en die vraag laat opvlam: beskerm isolasie ons, of steel dit ons menslikheid? Shangri-La was rou, intens en onrustig — ’n herinnering dat selfs in die donkerste gate, waarheid steeds die lig bring.
Die produksie het ook sy debuut by die Kopanong Fees gemaak, waar dit met twee nominasies vereer is: Artistic Distinction en Best Production.
Polka
2016
Polka het ’n spierwit wêreld oopgevlek waar realiteit sag buig en waansin soos poësie asemhaal. In ’n kothuisie buite tyd en plek ontmoet twee siele sonder vaste vorm: ’n meisie wat nêrens hoort nie, en ’n vrou wat oral kan wees.
Deur absurdisme, stilte en spel het die produksie gevra wat gebeur wanneer aanvaarding belangriker raak as begrip — wanneer gebrokenheid nie meer weggesteek hoef te word nie, maar iets word wat jou bevry. Dit was ’n storie oor drome wat nie vasgevang kan word nie, en oor die vreemde skoonheid van om jou lot met oop hande te ontvang.
Polka debuut by die Kopanong Fees aan die Universiteit van Pretoria.
